сущ.; -е, -е; -ер, -ери, -ера кьейи касдихъ ийизвай шел. Мехъерар йикьериз элкьуьрун гзафни-гзаф жегьилрихъ галаз тербиядин, несигьатчивилин кӀвалах гъиляй вегьинилай аслу жезва. ЛГ, 1992. Абур мелериз, Мехъерриз, йикьериз, шад ва пашман йикъара, са хуьр хьиз, кӀватӀ жедай, санал чпин дердияр ийидай. С. Муслимов. ЦицӀигъ-наме. - Вахчаг ви йикьез, пухчадиз гуй, нефс акъатайди! - лугьудай явашдиз Маяханум халади. Ш. Исаев. Завхоз.
* йикь авун гл., ни 1) кьейидахъ шел(ар) авун. 2) куьч. къалмакьал акъудун.
* йикь лагьана нар. эсиллагь. О-о-о! Идалай гьашер лам чаз хьайиди тушир!.. Йикь лагьана гьаятдиз хкведачир хьи! Р. Гь. Шагь Абасакай риваят.
* йикь-шуван \[йикьни-шуван\] сущ. кьиникь ва кьейидахъ ийизвай шел-хвал. Гьикьван йикьни шуван къати хьайитӀани, инсандин, мусурмандин ва миллетрин азадвал хвена кӀанда. А. А. Имам Ярагъ Мегъамед. Айвандихъ экъечӀай Къараханаз куьчедал кьиле физвай йикь-шуван акуна. А Къ. ЧӀарав. Хуьре йикь-шувандин ванер гьатна. Гь. Къ. Четин бахт.
* йикь-шуван акъудун гл., ни гъарай-эвер акъудун. Селимая, гьаясузвиликай хабар хьайила, за са йикь- шуван акъудна. Н. И. Гьакимрин папар.
* йикье гьатун гл., вуж; кьейидахъ ийизвай шелдик экечӀун. Эгер ада надинжвилер авуначиртӀа, Ян рекьидайди тушир, Авай-авачир са хва кьена, диде йикье, уьмуьрлух йикье гьатдачир. Гь. Къ. Лацу марал.
* йикье гьатмир, гьатайтӀа, кьве кифни атӀана экъечӀа 'са кар гъиле кьамир, кьурла, гьикьван четинвилер хьайитӀани, кьилиз акъуд' манадин мисал.