араб, прил. вичикай хабарар авай, вичикай чизвай. Гад вахтунда цун малум месэла я. Р. Ада авур гафар-чӀалар чаз вири малумбур тир. Р.
* малум авун ни вуж-вуч чирун. Халудин сусаз и кар гъакъван гьайиф хьанатӀани, мад ада масабуруз вичин дерт малум авунач. Ф. Халуни хтул.
* малум тир прил. чизвай. Къарамахидин патав малум тир вакъиаяр кьиле фидайлани, гьалар ихътин агъурбур тир... ЛГ, 2004, 12. VӀӀӀ.
* малум тирвал арал. 'ихтилат физвай кардикай авай чирвилиз килигна' манадин ибара. Малум тирвал, техил буллухвилелди авай касди, ам регъуьз тухудалди сафунай яна хапуршапурдикай михьда. З. Э. Муькъвел гелер. Малум тирвал, 60 лагьай йисара Дагъустанда лезгийрин Докьузпара район чукурна, кьве патахъ пайна. М. М. Лезги тӀвар алатӀа. Малум тирвал, чапхунчи халкьар чпин медениятдай ацукьай халкьарилай хейлин гуьгъуьна амукьун адетдин кар тир. Р. Р. Лезги халкьдин игитвилин эпос.
* малум тушир прил. чин тийидай, течир. Фетали хан 1789 - йисуз малум тушир азардикди кечмиш хьана. ЛГ, 2003, 14. VӀӀӀ.
* малум хьун гл, вуж-вуч аквадай, чир жедай гьалдиз атун. Хъипи читинин булушкадин гьяркьуь хел къакъажна, Зелфиди гъил це твазвай, булах галай патахъ са гъихьтин ятӀани къаралту малум хьана. А. А. Умуд. ШуькӀуь рацӀамарни кьебекьрин чӀарар акьван расу я хьи, абур лацу чинал асла малум жезвач. А. А. Ирид цаварик Самурдин ван. Югъ малум жезмазни уях хьайи Мегъамедрасулаз вич цӀийиз Дуьньядал акьалтайди хьиз хьана. А. И. Самур. Гуьгъуьнлай, кӀамуз эвичӀзавай гьяркьуь рекьяй масад малум хьана. Ам чӀулав юргъа балкӀандал ала. М. М. Къизилдин хтар. Синонимар: ашкара хьун, чир хьун.