прил. 1) цӀивиндин, бипӀинрин ранг алай. # ~ чӀарар, ~ вилер, ~ рацӀамар; ~ костюм, ~ шал; ~ накьв, ~ ранг. ЧӀулав зилфер, лацу хъуьхъвер... Акваз кӀан я вун заз, гуьзел. Е. Э. Ваз маса яр хьана, гуьзел. Ам Саруханан куьк кавалдиз, рехивал ктканвай чӀулав чуру алай яру чиниз ва хци чӀулав вилериз килигна. А. Ф. Риза Б. Исмаилова кӀватӀай малуматралди, рекъидай кьиляй Эмин кьурай якӀарин, кьакьан буй авай, са тӀимил кьван винелди экъисай пер алай, чӀулав чӀарар алай ва яргъи спелар авай итим тир. Н. А. Етим Эмин. Шуткьу ва адан винелай алукӀнавай яйлух, кьуру чандал алай ва гьадав кьурвал гьал кумачир, йис янавай хилеш, хилешдин кӀаникай квай яргъи булушка - вири чӀулавбур тир. А. Къ. Нехирбанни лекь. 2) куьч. пис гьиссер арадиз гъидай. Ихьтин четин кӀвалах, пис дуланмиш хьунухь акурла, аялдин рикӀе мадни чӀулав хиялар къекъведай. А. Ф. Риза.
* рикӀ чӀулав хьун.
* чӀулав гъуьлягъ кьулак кутун гл., ни пис касдиз къулайвал гун, хъсанвал авун. Ша а фикир вегь на гъиляй, Эхир аватда вун виляй. Дуст я лугьуз чӀулав гъуьлягь, Кьулак кутаз хуьн хъсан туш. С. С. Хъсан туш.
* чӀулав гьер тукӀун гл., ни низ гзаф гьуьрметдин ва кӀанивилин лишан яз атай мугьмандиз чӀулав рангуннн гьер тукӀун. - Къала, гьинва чӀулав гьер? Гъваш, тукӀукӀ мугьманрин вилик! А. Къ. Нехирбанни лекь,
* чӀулав лекь сущ. бедендин къене патан паярикай сад. ЧӀулав лекьин ракдикди азарлу Эрих Хонеккер 1994 - йисуз кьена. ЛГ, 2004, 16. ӀX. Эгер чӀулав лекь тӀазваз хьайитӀа, са стакан некӀедиз кьве стакан пиво яна, йикъа пуд сеферда фу недалди вилик ишлемишда. ЛГ, 2003, 7. VӀӀ.
* чӀулав нафт сущ. михьи тавунвай нафт.
* чӀулав нуькӀ сущ. чӀулав цӀакулар алай, вичи макьамар адай нуькӀ.
* чӀулав сиягь сущ. пис крар авурбурун, тахсиркаррин сиягь. - АкӀ ятӀа, абур зи чӀулав сиягьда жедач... А. Фет. Вак хьтин.
* чӀулав турп сущ. чӀулав рангадин турп. Ивидин гемоглобин тӀимил тирла, ихьтин къаришмади куьмек гуда: са стакандавай газаррин, чугъундуррин ва чӀулав турпунин миже вири сад-садак какадарна ва аниз 200 г. вирт, са лимондин миже алава хъувуна холодилъникда хуьда. Йикъа пуд сеферда фу недалди са сят амаз хуьрекдин са тӀурунавайди ишлемишда. ЛГ, 2004, 15. VӀ 1.
* чӀулав хабар сущ. мукьвабурукай са вуж ятӀани кечмиш хьуникай хабар.
* чӀулав халкь. куьгь., сущ. къуллугъчийриз, агьайриз кӀвалахзавай зегьметчи халкь. ЧӀулав халкьди нарагъат яз оратордихъ акална яб, Гъардан рикӀе са кин аваз Заландаказ гана жаваб... А. Ф. Дяве.
* чӀулав хьун гл. чӀулав тир гьалдиз атун. МичӀи, чӀулав хьанвай цава далбадал цӀайлапанар хъиткьинна. Къ. М. Лезги къавахар. Шагъ-Буба халуди гъаятда накь межлис хьайивиляй цӀай, авур чкайрилай руьхъ шуткун хъувуна чӀулав хьанвай лекейри ва багъда итимар ацукьай чкадаллай алгъана михьиз чилик ккӀанвай къацу векьи лугьузвай. А. Къ. Нехирбанни лекь.
* агъдин са кьил лацу, са кьил чӀулав жедач.
* чӀулав-чӀулав прил. лап чӀулав. Хкаж жез ацукьзавай элкъвей ацӀай хурари, заз килигиз хьуьрезвай чӀулав-чӀулав вилери зун пертна, жув жувакай квадарна. З. Ш. ШайтӀандин веледар. Синоним: чӀуп чӀулав.
* чӀулав югъ сущ. ясдин югъ, инсан(ар) кьейи югъ. Лезгидихъ тахьуй са югьни чӀулав, Кфилди гьеле ван ийизмай кьван! Б. С. Чи хуьруьн юкьвал пӀир алай чкадал, лугьунрай, дагъвийрин кьиле акъвазай ва а чӀулав юкъуз кьейи мискӀандин жегьил имам кучуднава. Т. Саидов. ВикӀегь ШантӀур.
* чӀулава гьатрай ! $, межд. 'чӀехи хажалат хьурай' манадин къаргъиш,
* чӀулава ягърай ! $, межд. 'кьий, кьирай' манадин къаргъиш.