HUD

Şərqi Hədrəməutda Əl-Əhqaf adlı yerdə yaşamış, Yəmənin Ad qəbiləsinə göndərilmiş peyğəmbərlərdən biri olmuşdur (Quran, 46: 21). Rəvayətlərə görə Hud peyğəmbərin soyu Nuh peyğəmbərin oğlu Samdan gəlir. Hud erkən yaşlarından Allahı tanıyan, Ona ibadət edən inanclı bir insan olmuşdur. Onun ticarətlə məşğul olduğu rəvayət edilir. Ad qəbiləsi Yeməndə böyüklüyü və nüfuzu ilə seçilən bir qəbilə idi. Onların yaşadıqları yerlərin torpağı çox münbit olmuşdur. Buna görə də onlar, orada gözəl bağlar salmış, böyük saraylarda və evlərdə yaşamışdırlar. Bu saraylara Adül-İrəm Zdeyirlər. Adlılar fiziki olaraq ucaboylu və güclü olmuşdurlar. Bu üstünlüklərə baxmayaraq adlılar Allahın yolundan yayınmış, dindən uzaqlaşmış, bütpərəstliyə meyl etmişdirlər. Onlar Allahın verdiyi üstünlüklərini xeyirli işlərə deyil, başqa xalqları təhdid etmək, pozğunluqlar etmək üçün istifadə edirdilər. Buna görə də, Allah Hudu seçib adlılara peyğəmbər göndərmişdir. O da, onları uzun müddət bütlərə tapınmaqdan çəkindirməyə, doğru yola yönəltməyə çalışmışdır. (Quran, 11: 50-52). Ancaq, adlıların əksəriyyəti onun nəsihətlərini eşitmək belə istəməmişdirlər (Quran, 7: 66). Yalnız azlıq onu peyğəmbər kimi tanımışdır. Sonra adlılar ondan möcüzələrin göstərməsini tələb etdilər. O da böyük bir qayanı toza çevirmiş, küləyin istiqamətini dəyişmişdir. Buna baxmayaraq adlıların çoxu yenə tutduqları yoldan çəkinməmişdirlər. Hud peyğəmbər də onların cəzalanacaqları xəbərini verdi (Quran, 46: 21). Adlılar isə ona dedilər ki, əgər bacarırsınızsa cəzanı siz verin (Quran, 46: 22). Müəyyən vaxtdan sonra adlılar uzaqdan gələn böyük bir buludu gördülər. Onun arxasınca da güclü bir qasırğa qopdu və azmış adlıları məhv etdi (Quran, 41: 16). Bundan sonra Allah o torpaqlarda başqa xalqları məskunlaşmasını təqdir etmişdir (Quran, 23: 42). Bu fəlakətdən yalnız Hud və onun peyğəmbərliyini qəbul edənlər qurtulmuşdurlar. Onlar o yerdən köçərək müasir Məkkənin yerləşdiyi yerlərdə məskunlaşmışdırlar. Hud peyğəmbər də həyatının sonuna qədər orada yaşamışdır.