TRANSMİSSİYA

is. \[lat. transmissio "ötürmə, keçmə" < trans "arasından, içindən" + mission "göndəriş, xüsusi tapşırıqlı nümayəndə"\] 1. Nəyinsə diğər mərhələlərə, kəslərə və ya əşyalara ötürülməsi. 2. tex. Fırlanma momentini mühərrikdən nəqliyyat vasitəsinin təkərlərinə, torna dəzgahının patronuna ötürən və eyni zamanda gücün, sürətin dəyişdirilməsi üçün mexanizmlər toplusu. Transmissiyanın tərkibinə daxildirlər: mufta, kardan valı, diferensial, oynaqlı birləşmə. 3. hüq. □ İrsi transmissiya – mülkiyyətçiyə yaşadığı dövrdə məxsus olan əmlak (əmlakın müəyyən hissəsi) üzərində sərəncam vermək hüququ onun vəfatından sonra yaxın ailə üzvlərinə məxsus olmalıdır. Bu prinsip qanun üzrə vərəsəlik zamanı növbəlik, irsi transmissiya qaydalarında özünü göstərir və mirasın daha yaxın şəxslər dairəsinə çatmasına xidmət edir. 4. inc. □ Mədəniyyət transmissiyası – mədəniyyətin bir nəsildən digərinə öyrədilərək ötürülməsi. Qayda – dəyər – məna – simvol bloku və onları tarixən qidalandıran ictimai transmissiya mövcudluq formaları bloku arasındakı əlaqələrin təhlili mədəniyyətə, dövri şəkildə dəyişən laylarla və texnologiyalarla bağlı olan və daim hərəkət edən tamamlanmamış proses kimi baxmağa imkan verir ki, bu da müasir baxışlara uyğundur. «Xalq mədəniyyəti» anlayişina müasir baxişlar. (Tariyel Məmmədov). 5. xüs. □ Transmissiya yağları – tərkibində yeyilməyə qarşı aşqar (kükürd və xlorlu üzvi birləşmələr və s.) olan neft yağları.