Bunun xeyri var ki, zərəri yoxdur; Gülməli insanlar həyatda çoxdur.
□ Zərər çəkmək – zərər etmək, maddi itki vermək, zərərə məruz qalmaq.
[Kosaoğlu:] Allah ömrünü uzun eləsin, Qurban qağa, sən olan yerdə adam zərər çəkərmi?
Zərər dəymək – ziyan çəkmək.
Zərər etmək – alverdə qazanmaq istərkən itki vermək, maddi itkiyə məruz qalmaq.
[Məmmədbağır] Bakıdan apardığı fındığı, şabalıdı istədiyi qiymətə sata bilmədiyindən, zərər edirdi.
Zərər gətirmək – bax zərər vermək.
Mənim doğruluğum zərər gətirdi.
Zərər görmək – ziyan çəkmək.
[Sultan:] Sənin atan da, əmilərin də yersiz inadkarlıqdan həmişə zərər görüblər.
Zərər vermək – ziyan vermək, zərərli olmaq.
Yalan zərər verər daim insana; Yalançı bənzəyər məlun şeytana.
Zərər verməz – zərəri olmaz.
Gözümdə məskən et, xari-müjəmdən ehtiraz etmə; Güli-xəndanə sordum, xarə yar olmaq zərər verməz.
Zərər vurmaq – ziyan vurmaq, ziyan çəkməsinə səbəb olmaq.
Hərçənd bir çox mollalar təklikdə “sətr”in şəri olmadığını, məarif və tərəqqimizə zərər vurduğunu söyləyirdi, amma heç kəs meydana çıxıb aşkar deməyə cəsarət edəmiyordu. “”.
Zərər yox – zərəri yoxdur, eyib etməz, razıyam.
[Nadir bəy Aşıq Sultana:] Zərər yox, madam ki arzu edirlər, sazını al da gəl, fəqət çox gecikmə!
Zərərə düşmək – 1) bax zərər çəkmək;
2) məcburiyyət altında pul xərcləməyə məcbur olmaq.
Zərərə salmaq – pul xərcləməyə məcbur etmək.
[Aşıq Vəli:] Adama ümid-nevid verib, yerindən eləyib, zərərə salıb, axırda sözünə əməl eləməyənə lənət!
Zərəri çatmaq – zərəri dəymək.
De, görüm onların nədir səməri? Bəlkə də hər kəsə çatır zərəri.
Zərəri nədir – zərəri yoxdur.
Zərərin yarısından qayıtmaq – ziyan gətirə bilən bir işi davam etdirməyib yarımçıq qoymaq, başa çatdırmamaq.
[İmran:] Gəl mənə qulaq as, zərərin yarısından qayıt.
Nə zərəri var – bax zərəri nədir.
[Məşədi İbad:] Əlbəttə, nə zərəri vardır, cavanlıq olmasın, pul olsun.
// Maddi itki, xəsarət.
