сущ.; -чади, -чада; -чар, -чари, -чара 1) куьруь дувул галай, пеш алай набатат. Чи чкаяр дуьзни я, цик квай никӀерни ава, гьич тахьайтӀа, чуьлда хъач, тама кицикарни ава. М. Б. За бананар недач. Эй Худда- а! Зи душмандиз агалкьун гумир! Къуй адан несилар, цуьк акъудна, бегьер гъиз тахьай, къавун чӀередал экъечӀай хъач хьиз, шуьткьуьрай! М. В. Гьарасатдин майдандал. 2) недай ва хуьрекдик кутадай къацу пешер. Гьажи, сивяй туш - макьам ягъиз-ягъиз, "гъилевай синидал бугъ алахьзавай гьуьндуьшка, къайи гьекьеда авай гьерекьдин путулка, гьахьтин гьекь алай кьве "Рычал- яд", къацу хъчар, фу ва пуд рюмкани пуд истикӀан алаз, Багъдин пипӀе авай столдихь фена. А. Къ. Мал цаваравай савдагар ва я рикӀелни алачир командировка
* некӀед хъчар, недай хъчар, чӀуру хъчар.
* хъач авун векъи., рах., гл., ни ахлакьдив кьан тийидай амалар авун. Вилик физвайдахъ галкӀуриз кӀанз кӀвач, Ийида шаир критикди хъач. И. Гь.
* хъач-мач рах., сущ... чиляй экъечӀнавай гьар жуьредин хъчар. А чӀуру хъач-мач артух. хьайила, абуру вуч ийидайтӀа, чидани квез? Б. Гь. Заз эвера. Заз акӀ я хьи, халкь авур Халикьди инсанар кашакай къутармишун патал дяведин йисара хъач-мач буларна. З. Ф. РикӀелай фидач. Синоним: хъач-хъуч.
* хъач-хъуч рах., сущ. чиляй экъечӀнавай гьар жуьредин хъчар. За къерехра хкаж хьанвай хъач- къучдин валарик явашдиз кьуьл галукьарзавай. Т. А. Мехъер куьтягь тахьанмаз. Синоним: хъач-мач.
* хъчад афарар сущ. къени хъчар туна чранвай афарар (лезгийри рикӀ алаз недай). Суса хъчад афарарни чразва Чехирдини гузва чилин ширинвал. А. С. Вилик жерге. Гьам Балыкесирда, гьамни хуьре лезгийри гзаф дадлу афарар, хинкӀар, хешил, пичӀекар чразва. Къадир халудин папа мугьманар паталди хъчарин афарар чранай. Р. Гьасанан, И. Мегьралиев. Яргъара авай жуванбур У «Самур» газ.. 2002, 25.12