кӀан хьун гл., низ вуж-вуч; кӀан жеда, кӀан хьана; кӀан жен, кӀан хьухь, кӀан хьурай, кӀан жемир; кӀан тахьун, кӀан таххьун, кӀан хъжемир 1) муьгьуьббатдин гьиссер хьун, муьгьуьббатдин гьиссери кьун. Гуьрчегвилилиз гаф авач ви, Шан хьун четин кар я, суна. Е. Э. Суна, за ваз суьгьбет ийин. Къадир Аллагь, Вун гъахъ я хьи, са касдиз сад кӀан хьайила, ИкӀ ажайиб иер акуна Ви кьадар я, дугъриси. Е. Э. Дугъриси. 2) са кар кьилиз акъуддай хиял хьун. Марф ракъуриз кӀан хьанва окед Худадиз. Е. Э. КӀандач рекьиз гафар амаз лугьудай. Сифте йифиз зав рушвал гумачирди чир хьайила, гьа пакамахъ Селимаз зун рахкуриз кӀан хьана. А. М. Киф атӀайди. Хуьряй атай ярар-дустаризни Хидиран патав физ кӀан жедачир. Я. Къафаров. "Машаллагь, машаллагь" 3) нин-куьн ятӀани терефдар хьун. Гуьзел, за ваз лугьун са чӀал: Гьамиша вун акваз кӀан я. Е. Э. КӀан я. Жемятдиз зун кӀанзава, -лагьана за. – Завай колхоз гадариз жедач! К, 1988, 9. XӀӀ.
* кӀан хьайитӀани, кӀан тахьайтӀани нар. нелай-квелай аслу тушиз. Гьа инал заз маса халкьарин милли руьгьдик хкуьрзавай ксариз лугьуз кӀанзава: квез кӀан хьайитӀани, кӀан тахьайтӀани, чна чи тӀвар мадни, гьамиша хьиз, вине кьада. М. М. Чун гъвечӀи халкь туш.
* кӀан хьунухь сущ. муьгьуьббатдин гьиссер хьун. КӀан хьунухьни жеда, гъелбет, Фикир ая вуна хелвет. С. С. Гуьзел яр.