Əvvəllər bağlaq formasında olub. Barmaqların ələ birləşdiyi (bağlandığı) yerə “bilək” deyirik (ayaq biləyi ifadəsi də var). Bələk (uşağı bələmək) sözü də bağlaq kəlməsi əsasında əmələ gəlib. Buxov sözü də bağlav kimi işlədilib, ayaqları bağlamaq vasitəsidir, cidardır. Deməli, o da bağlamaq sözü ilə qohumdur. Bəzən bilək sözünü barmaqların sayına əsasən “beş” mənasını verən söz kimi şərh edirlər. Məncə, o qədər də doğru fikir deyil. Bəzi türk dillərində bilək əvəzinə bağış sözü işlədilir ki, bu da məhz kəlmənin bağlaq sözündən əmələ gəlməsinə dəlalət edir. Çuvaş dilində bu söz pilek kimi işlədilir və iki məna bildirir: “5 barmağın birləşdiyi yer”; “beş” sayı, ikinci məna sonradan törəmədir. (Bəşir Əhmədov. Etimologiya lüğəti)