SƏFEH

SƏFEH [Mirzə Ələsgər:] O ki Səftərqulu ağanın oğludur, o da səfehin birisidir (N.Vəzirov); AĞILDAN KASIB Eh, ay oğul, sən də məndən beşbetər ağıldan kasıbsan, ha!.. (M.Hüseyn); AXMAQ Sadıq: Deyən gərək, ay axmaq, nə üçün arvadın sözünə baxmırdın (S.Rəhimov); BAŞIBOŞ (dan.) Sənəm: Lap ondan da pisdir. Axmaqdır, başıboşdur (M.İbrahimov); ƏBLƏH (köhn., kl.əd.)Nola bir evdə qoyaydız qarabaş; Verməyəydiz məni bu əbləhə kaş! (M.Ə.Sabir); ƏHMƏQ (kl.əd.) Molla İbrahimxəlil: Qərib əhməqsən, sən nuxuluları mənə tanıdırsan? (M.F.Axundzadə); GİC (dan.) Şamaxı: Mənə nə desə yaxşıdır, köpəkoğlu, deyir ay dədə, gicəm bəyəm əlaçı olum, canıma cəfa basım (Anar); GİCBAŞ Çimnaz: Gicbaş arvad da Veysə necə tapşırıb, elə-elə gedib qızı istəyib (Ə.Əbülhəsən); GİCBƏSƏR (dial.) Bu gicbəsərin biridir (ADDL); İDİOT (anadangəlmə səfeh) Rafı: İdiot, bax buna deyərlər (Ə.Kərim); KƏMSƏR (dial.) Ay kəmsər, sənin məniynən nə işin var? (ADDL); KÖVDƏN (köhn.) Vəzir Ağa Başirə: Sən kövdən, bir mənim evimi, mənim nökərlərimi dolandıra bilmirsən! (M.F.Axundzadə); SARSAQ Vəli Oruca: Axmaq danışma, sarsaq! (M.F.Axundzadə); ZIRRAMA (dan.) Talıbov: Nə elədiyini başa düşürsənmi, ay zırrama?! (Y.Şirvan); BAŞSIZ (məc.) DILĞIR (dan.).