Səfiyyə Dibirova

Səfiyyə (Sofiya) Hacı qızı Dibirova (1933, Qullar, Balakən rayonu – 31 yanvar 2015, Balakən rayonu) — Azərbaycan dövlət və partiya xadimi, Azərbaycan Kommunist Partiyasının Qax (1970–1982), Vartaşen (1963–1970), Zaqatala (1962–1963), Balakən (1960–1962) rayon komitələrinin birinci katibi, Balakən Rayon Zəhmətkeş Deputatları Soveti İcraiyyə Komitəsinin sədri (1958–1960).

Səfiyyə Dibirova
Azərbaycan Kommunist Partiyası Qax Rayon Komitəsinin birinci katibi
1970 – 12 aprel 1982
Əvvəlki	Asiyət Yusifova
Sonrakı	Maksim Musayev
Azərbaycan Kommunist Partiyası Vartaşen Rayon Komitəsinin birinci katibi
1965 – 1970
Əvvəlki	vəzifə yenidən təsis edilib
Sonrakı	Ağabala Qasımov
Vartaşen Rayon Kolxoz-Sovxoz İstehsalat İdarəsi Partiya Komitəsinin katibi
1963 – 1965
Əvvəlki	vəzifə təsis edilib
Sonrakı	vəzifə ləğv edilib
Azərbaycan Kommunist Partiyası Zaqatala Rayon Komitəsinin birinci katibi
1962 – 1963
Əvvəlki	Sadıq Murtuzayev
Azərbaycan Kommunist Partiyası Balakən Rayon Komitəsinin birinci katibi
1960 – 1962
Sonrakı	Təmraz Əbdürrəhmanov
Balakən Rayon Zəhmətkeş Deputatları Soveti İcraiyyə Komitəsinin sədri
1958 – 1960
Əvvəlki	Fikrət Əfəndiyev
Şəxsi məlumatlar
Doğum tarixi	1933
Doğum yeri	Qullar, Balakən rayonu, Azərbaycan SSR, ZSFSR, SSRİ
Vəfat tarixi	31 yanvar 2015(2015-01-31)
Vəfat yeri	Balakən rayonu, Azərbaycan
Dəfn yeri	Balakən
Partiya	Sovet İttifaqı Kommunist Partiyası (1958–1991)
Təhsili	Azərbaycan Dövlət Pedaqoji Universiteti
Təltifləri

Səfiyyə Hacı qızı Dibirova 1933-cü ildə Balakən rayonunun Qullar kəndində kolxozçu ailəsində anadan olmuşdur. Orta məktəbi bitirdikdən sonra Nuxa şəhərinə gəlmiş və buradakı müəllimlər institutuna daxil olmuşdur. 1954-cü ildə ədəbiyyət diplomu ilə doğulduğu kəndə qayıdaraq məktəbdə müəllimlik etmişdir.^[1]

Səfiyyə Dibirova 1954–1956-cı illərdə kənd məktəbində pioner baş dəstə rəhbəri, 1956–1957-ci illərdə Balakən rayon pionerlər evinin direktoru olmuşdur.^[2] 1957-ci ilin yanvar ayında o, Azərbaycan LKGİ Balakən Rayon Komitəsinin Pioner və məktəblilərlə iş şöbəsinin müdiri təyin olunmuşdur. İki aydan sonra isə Balakən Rayon Zəhmətkeş Deputatları Soveti İcraiyyə Komitəsinin sədrinin müavini vəzifəsinə irəli çəkilmişdir.^[1]

1958-ci ilin iyun ayında Səfiyyə Dibirova Sovet İttifaqı Kommunist Partiyası üzvlüyünə qəbul edilmiş və eyni ildə Balakən Rayon ZDS İcraiyyə Komitəsinin sədri vəzifəsinə təyin olunmuşdur. Həmin illərdə vəzifələrdə çalışmaqla bərabər, Azərbaycan Dövlət Pedaqoji İnstitutunun Dil və ədəbiyyat fakültəsinin qiyabi şöbəsində təhsil almışdır.^[1]

1960-cı ildə Səfiyyə Dibirova Azərbaycan Kommunist Partiyası Balakən Rayon Komitəsinin birinci katibi vəzifəsinə irəli çəkilmiş və bu vəzifədə iki il çalışmışdır. 1962–1963-cü illərdə Azərbaycan KP Zaqatala Rayon Komitəsinin birinci katibi olmuşdur. 1963-cü ildə Vartaşen və Nuxa rayonları birləşdirildikdə Vartaşen Rayon Kolxoz-Sovxoz İstehsalat İdarəsi Partiya Komitəsinin katibi seçilmiş, iki il sonra bu rayonların ayrılması ilə Azərbaycan KP Vartaşen Rayon Komitəsinin birinci katibi kimi fəaliyyətini davam etdirmişdir. 1970-ci ildə Azərbaycan KP Qax Rayon Komitəsinin birinci katibi seçilmiş və 1982-ci ilin aprel ayına kimi bu vəzifədə çalışmışdır.^[2][3]

Səfiyyə Dibirova Azərbaycan Kommunist Partiyası Mərkəzi Komitəsinin üzvü olmuş, Azərbaycan SSR Ali Sovetinin altı çağırış (5–10-cu çağırışlar) deputatı seçilmişdir.^[4] Bir sıra orden və medallarla təltif edilmişdir. 11 iyun 2002-ci ildə Azərbaycan Respublikası Prezidentinin fərdi təqaüdünə layiq görülmüşdür.^[3]

Səfiyyə Dibirova 2015-ci il yanvarın 31-i doğulduğu Balakən rayonunda vəfat etmişdir.^[3]