REKREASİYA

is. \[pol. recreacya "istirahət" < lat. recreatio\] 1. İnsanın gərgin iş rejimindən sonra istirahət edib, itirdiyi enerjisini bərpa etməsi. 2. ekol. □ Rekreasiya dəyişmələri – istirahət edənlər və turistlər tərəfindən torpağın həddindən çox tapdanması (bərkiməsi), bitkilərin və xırda heyvanların məhv edilməsi nəticəsində ekosistemin tərkibinin, strukturunun və fəaliyyətinin antropogen diqressiyası (pisləşməsi). Rekreasiya dəyişmələri – əhalinin istirahəti üçün təbii komplekslərin (əsasən, meşə biosenozları) intensiv istifadəsi nəticəsində dəyişməsi. Rekreasiya meşələri – əhalinin kütləvi istirahət və əyləncə məqsədi üçün ayrılmış meşə sahələri. Rekreasiya potensialı – təbiət ərazisinin insana müsbət fiziki, psixoloji təsir bağışlaması xassəsi. Bu, əsasən, istirahət vaxtı təzahür edir. 2. coğr. □ Rekreasiya coğrafiyası – ərazi rekreasiya sisteminin – planetin quru ərazisində və akvatoriyasında istirahət yerlərinin yaradılması, yerləşdirilməsi və fəaliyyətini öyrənən coğrafiyanın bir sahəsi. 3. stat. □ Rekreasiya kadastrı – insanın istirahəti və sağlamlığının bərpası məqsədilə ayrılmış ərazilər haqqında məlumatların məcmusu. 4. hidromet. □ Rekreasiya su hövzəsi – əhalinin kütləvi istirahəti məqsədilə istifadə etdiyi su hövzəsi.