ƏYYUB

Qurana görə İsrail oğullarına göndərilən elçilərdən biri olmuşdur. Onun İshaq peyğəmbərin soyundan olduğu bildirilir. Əyyub bir-çox müsbət xüsusiyyətləri ilə yanaşı, sonsuz səbri və kamil imanı ilə digərlərindən fərqlənirdi (Quran, 38: 44). Rəvayətlərə görə Əyyub Şamda (Suriya) yaşamış və zəngin bir şəxs olmuşdur. Ayrıca o, ətrafında olan yoxsullara da yardım etmişdir. Allah Əyyubu peyğəmbər təyin etdikdən sonra o, yaşadığı yerdə dini yaymağa başlamışdır. Onun bir-neçə övladı olmuşdur. Rəvayətlərə görə Allah Əyyub peyğəmbəri sınağa çəkmək istəmişdir. Qısa bir zamanda o bütün var-dövlətini itirmişdir. Bu xəbəri ona çoban görkəminə girmiş şeytan çatdırmışdır. Ancaq Əyyub bu sınaqdan uğurla çıxaraq var-dövlətin Allaha məxsus olduğunu qeyd etmiş, Onun istədiyi vaxtı geri ala biləcəyini söyləmişdir. Sonra Allah Əyyub peyğəmbəri yeni ağır sınağa çəkmişdir. Güclü zəlzələ nəticəsində onun bütün övladları həlak olmuşdur. Bu xəbəri də ona övladlarının müəllimi görkəminə girmiş şeytan çatdırmışdır. Əyyub peyğəmbər bu fəlakətə də səbir edib, Allahın istəyinə tabe olduğunu bildirdi. O qeyd etmişdir ki, övladları ona Allah vermiş və istədiyi vaxtda onları ondan ala bilər. Sonra Əyyub peyğəmbər ağır xəstələnmiş, durumu gündən-günə ağırlaşmış və hətta gəzə bilməmişdir. Bütün qohumları ondan uzaqlaşmışdır. Yalnız Əyyub peyğəmbərin həyat yoldaşı onun yanında qalmış, ona qulluq etmişdir. Bu dəfə də Əyyub peyğəmbər Allaha şükürlər edib, Onun istəyinə tabe olduğunu bildirmişdir. Bu zaman şeytan şəhərdə Əyyubun yoluxucu xəstəliyə tutulduğunu və bu xəstəliyə şəhər sakinlərinin də yoluxa biləcəyi xəbərini yaymışdır. Bunu eşidən adamlar Əyyubu və arvadını şəhərdən qovmuşdurlar. Onlar da şəhərin ətrafında bir yerdə məskunlaşmağa məcbur qalmışdırlar. Əyyubun xəstəliyi yeddi il sürsə də, o bir kərə belə olsun bu ağır vəziyyətindən narazılığını bildirməmişdir. Şeytan isə Əyyubun arvadını ondan boşanmasına təhrik edirdi. Bir gün Əyyub xəstəliyi dözülməz bir həddə çatdıqda Allaha dua etmiş (Quran, 21: 83) və Allah bu duanı eşidərə, onun yanına Cəbrayılı göndərmişdir. O da Əyyuba böyük mükafatın veriləcəyi xəbərini çatdırmışdır. Allah Əyyub peyğəmbərə onun sağlamlığını, var-dövlətini, övladlarını geri qaytarmış və bundan da artığını vermişdir (Quran, 21: 84, 38: 43). Belə ki, Allah ona möcüzələr göstərmək bacarığını vermiş və o uzun ömür sürmüşdür.