Azərbaycan Tibb Universitetinin Hərbi Tibb fakültəsi
Azərbaycan Tibb Universitetinin Hərbi Tibb fakültəsi — Ümummilli lider, böyük öndər Heydər Əliyevin uzaqgörənliyi, müstəqilliyimizin qorunub saxlanmasi üçün bütün sahələrdə olduğu kimi ordu quruculuğuna verdiyi töhfələrdən Azərbaycan Tibb Universitetinin fakültələrindən biri.[2]
| Hərbi Tibb fakültəsi | |
|---|---|
| Azərbaycan Tibb Universiteti | |
| Yaradılma tarixi | 2000 |
| Dekan | Çingiz Əlləzov |
| Tələbə sayı | 487 |
| Yerləşməsi | |
| Ölkə |
 Azərbaycan |
| Şəhər |
 Bakı |
| Ünvan | Ceyhun Səlimov küçəsi 3. Silahlı Qüvvələrin Baş Klinik Hospitalının ərazisi[1] |
| Digər məlumatlar | |
| Sayt | amu.edu.az/page/243/esas… |
Tarixi
[redaktə | mənbəni redaktə et]Azərbaycan Tibb Universitetinin Hərbi Tibb Fakültəsi Azərbaycanın sabiq prezidenti Heydər Əliyevin 25 may 2000-ci il tarixli 425 nömrəli Sərəncamına əsasən yaradılmış və Hərbi tibbi təhsilinin bütün formalarının Azərbaycan Tibb Universitetinin Hərbi Tibb Fakültəsində mərkəziləşdirilməsi məqsədilə Azərbaycan Respublikası Müdafiə nazirinin 10 dekabr 2000-ci il 0128 nömrəli əmri ilə Tibb Heyətinin təkmilləşdirilmə kursları və Hərbi Tibb məktəbi (2017-ci ilin aprel ayından Feldşer Hazırlığı kursu adlandırılmışdır) də Azərbaycan Tibb Universiteti Hərbi Tibb Fakültəsinin tərkibinə daxil edilmişdir.[2]
Respublikamızda tibbi təhsilin iki pilləliyə keçidi ilə bağlı Azərbaycan Respublikası Nazirlər Kabinetinin 18 mart 2010-cu il tarixli 50 №-li qərarına müvafiq olaraq Müdafiə nazirinin 22 oktyabr 2011-ci il tarixli 297 nömrəli əmri ilə Azərbaycan Tibb Universitetinin Hərbi Tibb Fakültəsində rezidentura şöbəsi də yaradılmışdır.[2]
5 mart 2022-ci ildə Milli Müdafiə Universitetinin tabeliyinə verildi.
Haqqında
[redaktə | mənbəni redaktə et]Hərbi Tibb Fakültəsinin tapşırığı Azərbaycan Respublikası Silahlı Qüvvələrinin ehtiyacına uyğun hərbi həkim, hərbi həkim mütəxəssislər və feldşer hazırlamaq, eyni zamanda ordumuzda çalışan tibb heyətinin müxtəlif ixtisaslar üzrə təkmilləşməsini həyata keçirməkdir.[1]
Hərbi Tibb Fakültəsinin tabeliyində 4 kafedra fəaliyyət göstərir: Hərbi cərrahiyyə kafedrası, Hərbi terapiya kafedrası, Tibbi-profilaktika kafedrası və Tibb xidmətinin təşkili və taktikası kafedrası.
Bu günə kimi Hərbi Tibb Fakültəsində Rezidentura kursunda 57 nəfər həkim-mütəxəssis, Hərbi həkim hazırlığı kursunda 559 nəfər Azərbaycan Respublikası Müdafiə Nazirliyi üçün, 71 nəfər Azərbaycan Respublikası Ədliyyə Nazirliyi üçün, ümumilikdə 630 hərbi həkim hazırlanmış və Silahlı Qüvvələrin sərəncamına verilmişdir. Feldşer Hazırlığı kursunda isə Azərbaycan Respublikası Silahlı Qüvvələri üçün 550 hərbi feldşer hazırlanmışdır.[1]
Hərbi Tibb Fakültəsində 535 nəfər (378 zabit, 157 mülki qulluqçu) müxtəlif tibb ixtisasları üzrə Təkmilləşdirmə kursunda təhsil almışdır.
Hal Hazırda Hərbi Tibb Fakültəsində Rezidentura kursunda 60 rezident, Hərbi Həkim hazırlığı kursunda 388, Feldşer hazırlığı kursunda 39 nəfər tələbə və kursant təhsil alır.[2]
Hərbi Tibb fakültəsinə qəbul
[redaktə | mənbəni redaktə et]Namizədlər Müdafiə Nazirliyinin Mərkəzi Hərbi Poliklinikasında hərbi həkim komissiyasından keçirlər. Hərbi həkim komissiyasından keçmənin tarixi sənəd qəbulu zamanı qəbul komissiyası tərəfindən bildirilir.
Naxçıvan Muxtar Respublikasında yaşayanlar hərbi həkim komissiyasından Heydər Əliyev adına Hərbi Liseydə (Naxçıvan şəhəri) keçirlər. Müvafiq yoxlamalardan müvəffəqiyyətlə keçən namizədlərin siyahısı qəbul imtahanında iştirak etmək üçün Dövlət İmtahan Mərkəzinə göndərilir.[1]
Hərbi tibb və Stomatologiya ixtisasları üzrə: Namizədlər Dövlət İmtahan Mərkəzi tərəfindən keçirilən qəbul imtahanı verirlər. Qəbul imtahanları IV ixtisas qrupunun fənləri üzrə keçirilir.
Hərbi feldşer işi ixtisası üzrə: Namizədlərin Hərbi Tibb Fakültəsinə qəbulu müvafiq tədris ilində tam orta təhsil səviyyəsi üzrə buraxılış imtahanı verən abituriyentlərin buraxılış imtahanında, digər abituriyentlərin isə müvafiq tədris ilində keçirilən qəbul imtahanında əldə etdikləri nəticələrə əsasən Dövlət İmtahan Mərkəzi tərəfindən həyata keçirilir.[1]
Qəbul imtahanının tarixi Azərbaycan Respublikasının Dövlət İmtahan Mərkəzi tərəfindən müəyyənləşdirilir. Sənədlər Azərbaycan Tibb Universitetinin Hərbi Tibb Fakültəsində qəbul olunur.[3]
Naxçıvan Muxtar Respublikasında yaşayanlar sənədlərini Heydər Əliyev adına Hərbi Liseyə (Naxçıvan şəhəri) təqdim edirlər.
İstinadlar
[redaktə | mənbəni redaktə et]- ↑ 1 2 3 4 5 "Azərbaycan Tibb Universitetinin Hərbi Tibb Fakültəsinə Hərbi tibb, Stomatologiya və Hərbi feldşer işi ixtisasları üzrə 2022/2023-cü tədris ili üçün qəbul qaydaları" (az.). https://mod.gov.az. Archived from the original on 2023-01-09. İstifadə tarixi: 3 yanvar 2023.
- ↑ 1 2 3 4 "HƏRBİ TİBB FAKÜLTƏSİ" (az.). https://amu.edu.az. Archived from the original on 2023-01-09.
- ↑ "Azərbaycan Tibb Universitetinin hərbi tibb fakültəsinə 2022-2023-cü tədris ili üçün qəbul qaydaları açıqlanıb" (az.). https://azertag.az. Archived from the original on 2023-06-29.
Həmçinin bax
[redaktə | mənbəni redaktə et]- Azərbaycan Tibb Universiteti
- Azərbaycan Respublikasının Dövlət Təhlükəsizliyi Xidməti
- Heydər Əliyev adına Hərbi İnstitut
- Milli Müdafiə Universiteti (Azərbaycan)
Xarici keçidlər
[redaktə | mənbəni redaktə et]- "HƏRBİ TİBB FAKÜLTƏSİ" (az.). https://amu.edu.az. 09.01.2023 tarixində arxivləşdirilib.
- "Azərbaycan Tibb Universitetinin hərbi tibb fakültəsinə 2022-2023-cü tədris ili üçün qəbul qaydaları açıqlanıb" (az.). https://azertag.az. 10.01.2023 tarixində arxivləşdirilib.
