E.ə. 377-ci ildə Kiçik Asiyanın cənub-şərqini Mavsol isimli hökmdar idarə etməyə başlayır. Kiçik Asiyanın bu hissəsi Kariya adlanırdı. Mavsol yunanlar və onların mədəniyyətinə valeh idi, daim yunan şəhərləri arasında yaranan münaqişələrə qarışırdı. Nəhayət, çar Kariyanın paytaxtını sahil şəhəri Halikarnasa köçürür.
Mavsol bütün yunan dünyasına hökmranlıq etmək arzusunda idi. O, Egey dənizi adalarını hakimiyyəti altında olduqları Afinaya qarşı qızışdırır və Kariya sahillərinə yaxın yerləşən Rodos adasına nəzarəti ələ keçirir. Ancaq bundan az sonra, e.ə. 353-cü ildə çar qəflətən vəfat edir.
Mavsolun dul qalmış həyat yoldaşı Artemisiya təsəllini ərinə abidə ucaltmaqda tapır. O, Halikarnas limanından ucalan nəhəng məqbərə inşa etməyi əmr edir. Məqbərədə dünyasını dəyişmiş çarın nəşi ilə yanaşı, onun bir neçə böyük heykəli də var imiş. İçəridən tikilinin divarlarını barelyeflər bəzəyirmiş. Amma məqbərə dövrümüzə qədər gəlib çıxmayıb.
Yunanlar Mavsolun Mavsoley adlandırılmış abidəsini dünyanın yeddi möcüzəsi siyahısına daxil etmişlər. İndi biz Mavsolu ancaq buna görə xatırlayırıq. O vaxtdan etibarən dəbdəbə ilə bəzədilmiş istənilən məqbərə və ya “vahiməli” görkəmi ilə sərdabəni xatırladan istənilən tikili mavzoley adlanır. (Ayzek Azimov. Sözlərin tarixi)
