Susayqışlaq (Quba)

Susayqışlaq — Azərbaycan Respublikasının Quba rayonunun inzibati ərazi vahidində kənd. Azərbaycan Respublikası Ali Sovetinin 7 fevral 1991-ci il tarixli, 54-XII saylı Qərarı ilə Quba rayonunun Yelenovka kənd Sovetindən Susayqışlaq kəndi Aşağı Atuc kənd Sovetinin tərkibinə verilmişdir.^[1]

Yaşayış məntəqələrini Susay kəndindən köçüb gələnlər salmışdır. Oykonim Susay (kəndin adı) və qışlaq coğrafi terminindən ibarət olub, "Susay kəndinin qışlağı, susaylılara məxsus qışlaq" mənasındadır. Eyni adlı kənd Xaçmaz rayonunda da mövcuddur.^[2] Susay sözünün etimoloji mənası:Su qədim Oğuz türkçəsində çay deməkdir,say isə dayaz yer deməkdir,yəni Susay çayın dayaz yeri deməkdir.

Kənd Qusar maili düzənliyində, rayon mərkəzində 15 km məsafədə, Quba-Xudat magistralı yaxınlığında, Qusarçayın orta axarında yerləşir. Çay kənarı seyrək palıd və qovaq ağaclarından ibarət meşəlikdən (Qusar Dövlət Təbiət Yasaqlığının qurtaracağı) və kolluqlardan ibarətdir. Kənd ərazisinin əsas hissəsini meyvə bağları (alma, gilas və s.) və əkin sahələri tutur.

Kənd əhalisinin əsas hissəsini azərbaycanlılar təşkil edir. 2009-cu ilin siyahıya alınmasına əsasən kənddə 511 nəfər əhali yaşayır.^[3]

Əhalinin əsas məşğuliyyəti bağçılıq və heyvandarlıqdır.

Kənddə 1 əsas məktəb fəaliyyət göstərir.

Kənddə tibb məntəqəsi mövcuddur..

Quba rayonu haqqında olan bu məqalə bu məqalə qaralama halındadır. Məqaləni redaktə edərək Vikipediyanı zənginləşdirin.