ORUC

günəşin doğuşundan batmasına qədər yeməkdən, içməkdən və cinsi yaxınlıqdan uzaq duraraq Allaha edilən ibadətdir. Ramazan ayında oruc tutmaq İslam dininin əsas şərtlərindən biridir. Quranın 2-ci surəsinin 183-cü ayəsində orucun vacib olduğu qeyd edilmişdir. İslam alimlərinə görə Ramazan ayında orucun tutulması Məhəmməd peyğəmbərin Mədinəyə hicrət etməsindən sonra hicrətin 2-ci ilində baş verən Bədr döyüşündən öncə vacib qılınmışdır. Ona qədər Məhəmməd peyğəmbərlə onun davamçıları Məhərrəm ayında oruc tutmuşdurlar. Başqa bir xəbərə görə isə İslamın ilk dövrlərində hər ayda iki gün oruc tutulmuşdur. Müsəlmanlar oruc tutarkən Allahın onlara mərhəmətli olmasını, eləcə də günahlarının bağışlanmasını diləyirlər. Ramazan ayında müsəlmanlara başqa aylara nisbətən daha çox ibadətlər və xeyirli işlər görmək tövsiyə edilir. Onlar inanır ki, Allah oruc tutanın günahlarını bağışlayıb cənnətə yaxınlaşdırır. Yetkinlik yaşına çatmış sağlam düşüncəli müsəlmanlar oruc tutmalıdırlar. Səfərdə olanlar, uşaqlar, xəstələr oruc tutmaya bilərlər. Heyz və ya nifas halında olan qadınlar oruc tutmamalıdırlar. Onlar buraxılan günlərin yerinə orucu Ramazan ayı bitdikdən sonra qəza etməlidirlər. Orucu tutmağa imsak vaxtından başlamaq lazımdır. Orucu tutarkən isə buna niyyət edilməlidir. Gün ərzində yemək, içmək, siqaret çəkmək, cinsi yaxınlığa girmək olmaz. Özünü bilərəkdən qusdurmaq da orucu pozar. Ancaq, müsəlman bunları bilmədən, unudaraq edərsə, onda oruc pozulmaz. Ağız suyu udula bilər. Əgər insan bilərəkdən orucunu pozarsa, günah əməl işləmiş olur. Belə olarsa o, tutmadığı günlərin yerinə başqa vaxt daha da çox qəza orucunu tutmalı, üstəlik kəffarə də verməlidir. Oruca başlamazdan öncə tezdən yuxudan durub səhər yeməyi yeyilməlidir. Ona “obaşdanlıq” və ya sühur deyilir. Günəş batan kimi də oruc iftarla açılmalıdır. İftar gecikdirilməməli, vaxtında açılmalıdır. Oruc tutan kəs dində haram və məkruh işlərin görülməsindən çəkinməlidir. Bilərəkdən kiməsə pislik etmək, yalan danışmaq və s. əməllər olmaz. İslamda vacib və nafilə orucları vardır. Vacib oruc Ramazan ayında tutulandır (Quran, 2: 185). Ramazan ərzində müsəlmanlar Qədr gecəsinin axtarışında olur, müxtəlif dualar edir, təravih namazlarını qılırlar. Ramazan ayının sonunda isə yoxsullara fitrə zəkatı verilir. Əgər müsəlman üzrlü səbəblərdən Ramazan ayındakı orucun hamısını və ya bir necə gününü tuta bilməsə, onda həmin günlərin qəzasını başqa aylar ərzində tutmalıdırlar (Quran, 2: 185). Nafilə orucları isə sayca çoxdur. Onlardan bəziləri Şəvval ayının altı günündə, Zülhiccə ayının ilk on günündə, Şəban ayının isə bəzi günlərində tutulan oruclardır.