1. TİKMƏK (inşaata dair) [Qardaş:] Tozlu küçələrin, palçıq evlərin hamısını söküb təzə evlər tikəcəyik (M.İbrahimov); BİNA ETMƏK Qulu: ..nəqd pul eləyib gedəsən ziyarətə, ovdan tikdirəsən, məscid bina edəsən fəqir-füqəraya?! (N.Vəzirov); BİNA QOYMAQ Məşədi Əsgər: ..gəmiçilik şirkəti bina qoydu (Qantəmir); İNŞA ETMƏK/ELƏMƏK Qulam müəllim: Qoy bu qızlarımızdan.. birisi də bizim bu dağlı məhəlləsində yeni-yeni binalar inşa etsin (S.Rəhimov); QURMAQ Bu axır vaxtlarda Qafqazın müsəlmanları gözlərini açıb başladılar hey bir ucdan məktəb binası qurmağa (C.Məmmədquluzadə); SALMAQ ..Nahiyənin rəhbərləri.. dərənin üstündən körpü salırdılar (Ə.Əbülhəsən); YAPMAQ (köhn.) Bir imarət yapmağa min ev yıxan memar tək (Füzuli).
2. TİKMƏK (paltar və s.) [Ballı:] Kişinin yaxasını niyə cırırsan. Axır təzəcə tikmişəm (Çəmənzəminli); SIRIMAQ Gülcahan: Vay, yorğanı sırıyanda yaddan çıxıb qayçı içində qalıbdır (T.Ş.Simürğ).
