YUSİF

Allahın göndərdiyi peyğəmbərlərdən bir olmuşdur.

“Yusif” (12) surəsinin bütün məzmunu ona həsr edilmişdir. O, Yaqub peyğəmbərin Rəhilədən olan oğlu olmuşdur. Atası onu qardaşlarından çox istədiyinə görə onlar onu qısqanmışlar (Quran, 12: 8). Onlar Yusifi özləri ilə çölə apararaq onu öldürmək istəmiş, ancaq son anda qardaşların biri onun öldürülməsini deyil, bir quyuya atılmasını təklif etmişdir (Quran, 12: 10).

Qardaşlar evlərinə qayıdınca Yaqub peyğəmbərə demişdilər ki, Yusifi canavar parçalamışdır. Bunun sübutu kimi onun heyvan qanına bulaşmış köynəyini ona göstərmişdirlər.

Yusifi quyudan karvanla Misirə gedən insanlar qurtarıb onu özləri ilə aparmış, orada bir yüksək rütbəli məmura kölə kimi satmışdırlar. Yusif bir müddət onun evində yaşamışdır. O, yetkinlik yaşına çatdıqda isə, Allah ona peyğəmbərlik vermişdir.

Ancaq, o məmurun həyat yoldaşı Züleyxa gözəlliyi ilə seçilən Yusifə vurulmuş, onunla yaxınlıq etməyin yollarını axtarmağa başlamışdır. Yusif onun təklifindən imtina edildikdən sonra Züleyxa onu onunla yaxınlıq etməyə cəhd etməkdə günahlandırmışdır (Quran, 12: 23-26). Onun əri isə Yusifin şərləndiyini bilmiş, ancaq bu məsələni ört-basdır etmək üçün onu zindana atdırmışdır.

Orada uzun müddət qalan Yusif günlərini ibadətlərdə keçirmişdir. Allah ona yuxu yozmaq bacarığını vermişdir. Onunla zindanda Misir Fironunun keçmiş aşpazı və şərab paylayanı da olmuşdurlar. Gecələrin birində onların hər ikisi yuxu görüb, bu yuxuların yozulması üçün Yusifin yanına gəlmişdirlər (Quran, 12: 36). Yusif də birinin edam olunacağını, digərinin isə azadlığa çıxacağı və fironun qulluğuna qayıdacağı xəbərini vermişdir.

Daha sonra Yusif buraxılacaq dustaqdan fironuna onun haqqında söhbət açmağı istəmişdir. Sonra Yusifin dedikləri gerçəkləşmişdir.

Ancaq, sərbəst buraxılmış adam fironun sarayında qulluq etməsinə baxmayaraq Yusifin istəyini yerinə yetirməmişdir.

Buna görə də o, daha bir neçə il zindanda qalmışdır. Gecələrin birində Misir fironu da qəribə bir yuxu görmüş, saraydakıları yanına toplayaraq onlardan bu yuxunun yozumunu tələb etmişdir. Ancaq, onlardan heç biri bunu edə bilməmişdir (Quran, 12: 44). Onda həmin o keçmiş dustaq Yusifi yada salaraq onun yuxuları yozma bacarığı haqqında firona məlumat vermişdir. Firon da Yusifin yanına gətirilməsini əmr etmiş, onu gətirdikdə ondan onun yuxusunun yozulmasını tələb etmişdir. Yusif də onun yuxusunun məzmunu ilə tanış olduqdan sonra bu ərazilərdə quraqlığın düşəcəyi haqqında xəbər vermişdir. Sonra o, Firona demişdir ki, quraqlıq dövründə aclıq düşməsin deyə bir neçə il boyu məhsul yığılıb anbarlarda tədarük edilməlidir (Quran, 12: 47-49). Bundan sonra Yusif azadlığa buraxılıb saraya gətirilmişdir. Orada o yüksək məmur olub məhsulun tədarük edilməsi işinin məsuliyyətini öz boynuna götürmüşdür. Bir neçə ildən sonra quraqlıq dövrü başlamış, ancaq görülən işlər və toplanan sərvətlərə görə Misir xalqı heç bir çətinliklə qarşılaşmamışdırlar. Tezliklə digər qonşu ölkələrdə quraqlıq səbəbi ilə aclıq başlamışdır. Aclıqdan qurtulmaq istəyən insanlar Misirə gəlib, taxıl, eləcə də digər yeyinti məhsulları alırdılar. Gələnlərin arasında Yusifin qardaşları da olmuşdurlar.

Yusif onları tanıyandan sonra aralarında müəyyən hadisələr baş vermişdir. Ancaq, sonda Yusif onları bağışlamış, atası Yaqubla birlikdə onları Misirə dəvət etmişdir. Beləliklə, Yaqub peyğəmbərin oğullarının soyundan gələn İsrail oğulları uzun müddət Misirdə yaşamışdırlar. Ancaq, sonra misirlilər onlarla pis davranmış, onları kölə etmişdirlər. İsrail oğullarını köləlikdən isə Musa peyğəmbər qurtarmışdır.

YUSİF

Digər lüğətlərdə

YUSİF

YUSİF

YUSİF

YUSİF

YUSİF

Obastana Qoşul.