HİYLƏGƏR

HİYLƏGƏR Dedi: – Rədd ol, hiyləgər! Lovğalanma bu qədər! (A.Şaiq); BİC Kəndlilər arasında belə bir söz gəzirdi ki, Şahbaz bəy bic adamdır... (M.İbrahimov); BİCƏNGƏ(NƏ) (məh.) [Dayıoğlu:] Amma elə ki bicəngə xalaoğlum başladı dayımı yamsılamağa və dayım kimi dodaqlarını tərpətməyə, ... doğrusu, mən də gülməyə başladım (C.Məmmədquluzadə); CÜVƏLLAĞI Həsən yazıq türkəsaya adamdır, birdən keçər bir cüvəllağının əlinə, yıxar evimi, papağımı vurar yerə, ciyərim od tutub yanar, əlim bir yana çatmaz (M.İbrahimov); ÇOXBİLMİŞ (dan.) Qəndab: Yaxşı deyirlərmiş ki, yetim çoxbilmiş olur (B.Bayramov); DƏLƏDUZ Malik: Bunlar da o dələduz Malik ibn Səidin aşıqlarıdır (A.Şaiq); ƏMƏLBAZ Demək, bu əməlbaz arvad oturduğu yerdə ..qızını söz-sovdan qurtardı (S.Rəhimov); ƏYYAR Əyyar İbrahim Şiraza gələndən sonra Fərəc ixtisara düşən bir müəllim vəziyyətində qalmışdı (Qantəmir); FAQQI (dial.) Fatma çox faqqı arvaddı (ADDL); FƏNDBAZ (dan.) Əhməd: Zalımoğlu nə fəndbazmış, a gədə!.. (N.Vəzirov); FIRILDAQÇI Zöhrə: Anam fırıldaqçı adamları sevmir (M.İbrahimov); FƏNDGİR Mircəlil Fətiyə: Yaşa! Fəndgir oğlansan, – dedi. – İndi tapdığın çörəkdən bir tikə özün ye, birini də rəis müavininə nəzir elə (Ə.İldırımoğlu); HARAMZADƏ Zəki: Min cür fırıldaq işlətmiş bu qoşa haramzadələr indi məhkəmə kürsüsündə cüt oturmuşlar (Anar); HƏLLƏM-QƏLLƏM (dan.) Xan: Ay gedə, sən çox həlləm-qəlləm adama oxşayırsan... (Çəmənzəminli); HİYLƏBAZ A hiyləbaz molla, sənin bu kələyini biz də duymuşuq (S.S.Axundov); JULİK (dan.) Ham dükançı Hüseyn? Ədə, o yaman julik, yaman adam.. (A.Şaiq); KƏLƏKBAZ Əsgər: Halal olsun Süleyman, sən nə kələkbazsan, şeytan! (Ü.Hacıbəyov); QURNAZ (köhn.) Oqtay: Təbiət qurnaz baqqallar kimi bizi aldadır (C.Cabbarlı); LOTU (dan.) Qurbanəli bəy: Amma beş-on il bundan irəli burada bir pristav vardı; çox lotu oğlan idi (C.Məmmədquluzadə); MƏKRLİ O, görünür, hiyləgər və məkrli düşmənindən intiqam almaq üçün sənətin ecazkar qüdrətini sınaqdan keçirmək istəyirdi (M.Hüseyn); NADÜRÜST Qəmrar: Hamımız deyirdik ki, bu nadürüst adamları başından elə, qulaq asmırdı (S.Rəhman); ŞARLATAN Bunlar da yaxşı adamlardır, amma şarlatandırlar (C.Məmmədquluzadə); ŞEYTAN (məc., dan.) Səlimə: Ax, necə şeytandır... hər kəsin ürəyinə girməyi necə bacarır (İ.Əfəndiyev); TÜLƏK (dial.) Nemət tülək adamdı (ADDL); TÜLKÜ (məc., dan.) Səfər tülkü olsa da axır tələyə düşdü; Olan olmuşdu artıq, ötən dəxi ötmüşdü (M.Rahim); TÜLÜNGÜ (dial.) Abbas lap tülüngüdü (ADDL); VƏLƏDÜZZİNA (məh.) Xanpəri: İtil buradan, vələdüzina! (N.Vəzirov); ZATIQIRIQ (dan.) Qarovulçu Həmidə: İnanıram, qərdeşoğlu, Abdulla Qəmbərov zatıqırıq idi. Zatıqırıqdan hər nə desən gözləmək olar (H.Abbaszads); KAZİB (köhn.).