DAVA-DALAŞ (bir neçə şəxs, qonşu, qohum arasında olan narazılıq) Ancaq kənddən dava-dalaş, səs-küy azalmır (M.S.Ordubadi); ÇARPIŞMA ..dalaşanları aralamaq qeyri-mümkün idi, çarpışma davam edirdi... (Çəmənzəminli); DAVA (dan.) Dava təzədən qızışdı; başlar yarılmaqda idi; saqqallar yolunurdu; səs evlərə düşürdü (Çəmənzəminli); DAVA-ŞAVA [Alo:] Axır ay Şamo, bu dava-şavadan heç başım çıxır ki! (S.Rəhimov); DİDİŞMƏ İki qardaş arasında olan didişmələr get-gedə uzandı (A.Şaiq); QALMAQAL Emalatxanada böyük bir qalmaqal qalxdı (M.S.Ordubadi); QOVĞA Qovğa səsi getdikcə yavıqlaşırdı (Çəmənzəminli); VURHAVUR (əlbəyaxa olan dava) Kazım: Ay Allahqulu, yaxşı ki, yaxamızı bu vurhavurdan qurtardın (Çəmənzəminli).