1. Öz halından və ya başına gələn bir dərd və acıdan ah-zar etmə; məmnuniyyətsizliyini izhar etmə; giley.
İllər ayrısıyam, gəl qucaqlaşaq; Sevdiyim, şikayət zamanı deyil.
Ata-anasını görcək qız həyatından şikayətə başlardı.
Bu nə şikayətdir, bu nə nalədir?
□ Şikayət etmək (eləmək) – narazılığını, məmnunsuzluğunu bildirmək, gileylənmək, ah-zar etmək. Xəstəliyindən şikayət etmək.
– Şikayət eyləmə, biganədən səfa gəlməz; Nə gəlsə başına, ey xəstə, aşinadəndir.
[Mirzağa] hər zaman şikayət edər, keçmiş günləri xatırlar, onların geri qayıtmasını arzu edərdi.
2. Birinin haqsızlığı və düzgün olmayan hərəkəti barəsində rəsmi şəkildə verilən məlumat, ərizə.
[Qasıməli:] Xala, qlava Xudayar bəyin şikayətinə görə oğlun Vəliqulunu tutub atdı dama.
□ Şikayət etmək – 1) birinin özü barəsində edilən haqsızlıq haqqında rəsmi məlumat vermək.
Kimin İskəndər bəyin əlindən hökumətə şikayət etməyə cürəti vardı? ;
2) şikayətlənmək.
Birindən şikayət edəsən əgər; Danışmağa qoymaz, sözünü kəsər.
