Babaratma türbəsi

Babaratma türbəsi — Əyriçayın sol sahilində, Qanıx vadisində, Şəkinin Babaratma kəndi yaxınlığında 728-729-cu illərə aid türbə.

Babaratma türbəsi
Ölkə	Azərbaycan
Şəhər	Şəki
Yerləşir	Babaratma
Aidiyyatı	Sufizm
Tikilmə tarixi	728-729-cu illər
Azərbaycandakı tarixi abidələrin milli qeydiyyatı
Kateqoriya	Kompleks
Əhəmiyyəti	Yerli əhəmiyyətli

Əyriçayın sol sahilində, Qanıx (Alazan)-Həftəran vadisində Babaratma kəndi yaxınlığındakı qədim qəbiristanda eyniadlı məscid yerləşir. El arasında bura Pirbaba da deyilir. İlk mənbələrin məlumatına görə, Pirbaba və ya Babaratma məscidi bölgədə islamı yayan və Xəlifə Osmanın nəslindən olan ərəb sərkərdəsi Babai Rutab tərəfindən inşa olunmuşdur. Məscidin yanındakı türbədə məhz bu tarixi şəxsiyyət dəfn olunub. Vaxtilə türbədəki kitabələrdən biri üzərində aparılan tədqiqatlarda abidənin tarixi və üzərindəki yazı ilə bağlı qeyri-dəqiq məlumatlar verilmişdi. Belə ki, kitabənin tarixinin səhvən “hicri 1100-cü il” olması qeyd edilmişdir.

AMEA A.A.Bakıxanov adına Tarix İnstitutunun Orta əsrlər tarixi şöbəsinin əməkdaşları i.ü.f.d. Şahlar Şərifov, t.ü.f.d. Araş İftixari və Məhəmməd Pirmuxtari ilə birlikdə Pirbaba ziyarətgahı haqqında təhrif edilən və qaranlıq qalan məqamları dəqiqləşdirmək üçün Şəkidə elmi ezamiyyətdə olmuş, aparılan tədqiqatlar nəticəsində qəti olaraq müəyyənləşdirilmişdir ki, Şəkinin Babaratma ziyarətgahındakı məscid 728-729-cu illərdə Xəlifə Osmanın yaxın adamlarından olan "Babai Rutab" tərəfindən inşa olunmuşdur.^[1]