Ehtiyacı təcili ödəmək üçün dəyirmanda azca dən üyütməyə “ağnağaz” deyirlər. Bu kəlmənin mənşəyi barədə bir neçə mülahizə söyləmək olar:
1. Rus dilindəki “жнивье” mənasını verən anız sözümüz olub. Ağnağaz bununla bağlı ola bilər, yəni biçin zamanı yerə tökülmüş sünbülləri yığıb bir qədər dən düzəltmək və onu üyütmək.
2. Ağnağaz az-maz sözü ilə bağlı ola bilər, yəni az-maz dən üyütmək və zəruri ehtiyacı ilkin ödəmək.
3. Ağnağaz sözü alağız kəlməsinin dəyişmiş forması da ola bilər. Mənası “ağızı aldatmaq” (al – “aldat” sözünün qədim köküdür), yəni “azca qidalanmaq (mədəni aldatmaq)” deməkdir. Üçüncü yozum daha inandırıcıdır. Bəzi dialektlərdə indi də alağızdanmaq sözü işlədilir.