1. Birinə üz tutub söylənilən söz, çağırış (istər şifahi, istər yazılı). Xalqa müraciət.
2. Xahiş, iltimas, rica.
Məhəlli komitə, şöbə müdirinin … müraciətini bir həftə təxirə uğratmışdısa da, yenə Zeynaldan bir xəbər çıxmamışdı.
□ Müraciət etmək – 1) üz tutub demək.
…Veys bu dəfə Qadirə müraciət elədi…
[Müəllim:] Siz bu alətlə tanışsınızmı? – deyə sinfə müraciət edib soruşdu.
Elçinin atası uşaqlara müraciət etdi. ;
2) bir şey üçün şifahi və ya yazılı şəkildə birindən xahiş etmək, yaxud yanına getmək. Həkimə müraciət etmək. Məktubla müraciət etmək.
– [Nemət hakimə:] Haqqımı müdafiə etmək üçün ədalət qapısına müraciət edirəm.
Zeynal ötəyə-bəriyə müraciət edib, sabiq xidmətini geri istəyirdisə də, müvəffəq olmayırdı.
3. Geri dönmə, qayıtma.
□ Müraciət etmək – 1) dönmək, qayıtmaq.
[Yusif] Usta Xəlilin yanında qırx yaşında ikən sərraclıq sənətini bir il müddətində öyrənib Qəzvinə müraciət etdi. ;
2) məc. tarixi mövzu və s.-dən istifadə etmək, onun haqqında yazmaq. Keçmişə müraciət etmək.
– “Vaqif”də Səməd Vurğun yaxın keçmişə müraciət edirsə, “Fərhad və Şirin”də uzaq keçmişə, Nizami poemalarının əks etdirdiyi tarixə müraciət edir. ;
3) bir şeyi və ya şəxsi tapmaq üçün bir yerə baş vurmaq.
4. bax müraciətnamə.
