1. Boz rəng almaq, bozlaşmaq.
Qadın qoca olduğuna və saçlarının tamamilə bozardığına baxmayaraq, çöhrəsində görünən təravət onun gənclikdə malik olduğu gözəlliyi andırırdı.
// Solmaq, rəngi qaçmaq, rəngi getmək.
Qızın rəngi gül kimi bozarmışdı.
2. Yetişməyə başlamaq, biçilmək (dərilmək) vaxtı çatmaq. Arpalar bozarmışdır. Qarpızlar yavaş-yavaş bozarır.
3. Çiskinləşmək, tutqunlaşmaq; soyuqlaşmağa başlamaq, duman və soyuq olmaq.
Havalar bozarmışdır; Ağ saqqallı qış gəlir.
Payız fəsli olduğu üçün hava yaman bozarmışdı.
// Yaxınlaşmaq, əlamətləri görünməyə başlamaq.
Payız bozarır, dağüstü şəhərinin özündə və ətrafında meşələrdə ağaclar lütləşir.
4. Bişməyə, qovrulmağa başlamaq. Ət lap bozarıb, indicə xörək hazır olacaq.
5. məc. Üzə qabarmaq; hörmətsizcəsinə, ədəbsizcəsinə, qabacasına cavab vermək, acıqlanmaq.
Həsənov yenə bozarmaq istəyir, lakin cəsarət etməyib susur.
Tahir dostunun yanında pərtliyini gizlədə bilməyib, anasının üstünə bozardı…
◊ Qızarıb-bozarmaq – bax qızarmaq.