1. Qolun, döşün yanı ilə çiyin bəndinin altındakı hissəsi, qolun çiyinlə birləşdiyi yerin altındakı çuxur.
Kitabı vurun qoltuğunuza və Arazı hoppanın, keçin … vətəninizə.
Götürüb qoltuğuna çantasını; Məktəbə şövqi-tamam ilə gedir.
Dağlardan gah çantası quş dolu ovçular, gah da qoltuğu kitablı məktəbli uşaqlarının endiyini gördüm.
Atası iki əli ilə qoltuğunun altından yapışıb onu havaya qaldırar, atıb-tutardı.
□ Qoltuq cibi – paltarın iç tərəfində döşün üstünə düşən cib.
Xudayar bəy çubuğu doldurub, … əlini qoltuq cibinə uzadıb və bir çimdik qov çıxardıb tutdu … ağanın qabağına.
[Məhbusi] sonra şalvarın cibinə soxuşdurduğu yüz tüməni çıxarıb səliqə ilə bükdü və qoltuq cibinə qoydu.
2. Çay və ya dəniz sahilində su girintisi, körfəz.
◊ Qoltuğa girmək – 1) gəzə bilməyən və ya xəstə bir adamın yeriməsinə kömək etmək, onu ayağa qaldırmaq;
2) sıxılmaq, özünü gizləmək, ortaya çıxmamaq, küncbucağa qısılmaq.
Qoltuğa sığınmaq – 1) bax qoltuğa girmək 2-ci mənada;
2) pənah aparmaq, birinin himayəsi altına girmək.
Qoltuğa soxulmaq – bax qoltuğa girmək 2-ci mənada.
Qoltuğu altına almaq – himayəsi altına almaq, pərəstarlıq etmək.
Qoltuğu şişmək – bax qoltuğunun altı şişmək. Padşah fərəhləndi ki, belə bir qulu var.
Qonaqların yanında qoltuğu şişdi. ( ).
Qoltuğuna qarpız vermək – 1) çox tərifləmək, həddindən artıq şişirtmək;
2) ələ salmaq məqsədilə birini üzünə tərifləmək. Qoltuğuna vermək (papağını, xoruzunu, şələsini və s.
) – 1) biabır etmək, ifşa etmək;
2) rüsvayçılıqla qovmaq.
Həsənağa kimi zalımın biri getdi naçalnikdən xahiş elədi, bir də görəcəksən, papağımı qoltuğuma verib saldılar eşiyə.
Qoltuğunun altı şişmək – lovğalanmaq, təşəxxüslənmək, qürrələnmək (təriflənmək nəticəsində).
Qoltuğunun altına (qarpız) vermək – birini həvəsləndirmək, bir işi gördürmək, yaxud ələ salmaq üçün yalandan üzünə tərifləmək.
Qoltuq altında yaşamaq – birinin himayəsi altında yaşamaq.