1. Qatışıqdan, aşqardan və s.-dən təmizlənmək, süzgəcdən keçirilmək. Məhlul süzüldü. Su süzüldü.
// Sudan ayrılmaq. Qatıq süzüldü. Düyü süzülüb.
2. Axmaq, damcı-damcı tökülmək, sızmaq.
Sarxan… yanaqlarına süzülən ( f.sif. ) iri yaş damlalarını sildi.
Maya da özünü saxlaya bilməyib başını Səkinənin sinəsində gizlədərək süzülən ( f.sif. ) damcıları sildi.
Dinlə, meşədəki bulaq nə deyir? Baxma ki, süzülür o, gilə-gilə.
// Sızıb keçmək.
…Dan yeri sökülməyə başlayır, içəriyə işıq zolaqları süzülürdü.
Gülyanağa elə gəlirdi ki, göydən yerə süzülən ( f.sif. ) şəfəq Qəhrəmanlar kəndindəki gəncliyin, cavanların oxuduğu şən mahnının, qızların sevincinin, adamların məsud həyatının timsalıdır.
Günəşin ilk şüaları hisli bacadan içəri süzülərkən Fatı yorğanı üstündən götürüb tulladı.
3. Yarıyuxulu kimi olmaq; xumarlanmaq, axmaq (göz haqqında).
Yuxusuz maraltək hərdən süzülüb; Axan gözlərinin sədəqəsi canım.
Nə gözəl süzülür qara gözlərin; Əcəba, onları süzmək vaxtımı?
4. Üzülmək, ilmələri qaçmaq, seyrəkləşmək. Şalvarın dizləri süzülüb. Pencəyin qolları süzülmüşdür.