İsgəndəriyyə şəhərində incəsənət və elm ilahələrinin, yəni muzaların məbədi museyon adlanan yer olub. Muzey həmin museyson sözündəndir. (Bəşir Əhmədov. Etimologiya lüğəti)
E.ə. 323-cü ildə Böyük İsgəndər dünyasını dəyişdikdən sonra onun sərkərdələrindən olan Ptolemey imperiyanın ən zəngin əyaləti olan Misir üzərində nəzarəti ələ aldı. O, paytaxtı İsgəndəriyyəyə köçürərək, demək olar ki, qırx ilə yaxın orada cah-calal və rifah içində hökmranlıq etdi. Onun oğlu II Ptolemey də varis kimi taxt-taca sahib olduqdan sonra təxminən bir o qədər hakimiyyətdə oldu.
Ptolemeylər var qüvvələri ilə yunan dünyasında nüfuz qazanmaq istəyir, İsgəndəriyyəni Aralıq dənizi sahillərində ən mühüm şəhərə çevirmək üçün Misirin sərvətindən istifadə edirdilər.
Başqa işlərlə yanaşı, onlar elm xadimlərinin yaradıcılıqla sərbəst məşğul ola biləcəkləri bir məkan yaratdılar. Dövlət bu alimləri dəstəkləyir və iş üçün lazım olan hər şeylə təmin edirdi; məsələn, oradakı kitabxana tam olaraq həmin elm xadimlərinin ixtiyarına verilmişdi. Sonralar bu kitabxana qədim dünyanın ən böyük və məşhur kitabxanasına çevrildi. Həmin məkan Museyon (qədim yunan mifologiyasında 9 incəsənət və elm ilahəsi olan muzaların adından yaranıb) adlanırdı. Latın yazısında bu söz “museum” (yəni bizə yaxşı tanış olan muzey) oldu.
Museyon insanların xatirəsində qədim elm məbədi kimi qaldı. İncəsənət və elm sahəsindəki nailiyyətləri nümayiş etdirmək üçün binalar tikilməyə başlananda isə onları muzey adlandırdılar. (Ayzek Azimov. Sözlərin tarixi)
