1. Ağ olmaq, ağ rəng almaq. Divarlar əhənglənəndən sonra yaxşı ağardı. Kətan yuyulduqca ağarar.
2. Qarla örtülmək, qar basmaq.
Qar basmış və ağarıb gedən çöllərdən və təpələrdən başqa bir şey gözə dəymirdi.
Ağarıbdır düzlər, çöllər; Buz bağlayıb çaylar, göllər.
3. Görünmək, öz ağlığı ilə nəzərə çarpmaq (ağ şey haqqında). Dağların başı ağarır. Uzaqdan bir şey ağarır.
– Sadə izlər belə yox daşlarda; Ağ dumanlar ağarır qaşlarda.
4. Yuyulub təmizlənmək, silinib təmizlənmək, parıldamaq, rəngi açılmaq. Çəngəlbıçaqlar sürtüldükdən sonra ağardı.
5. Saç və saqqala dən düşmək; çallaşmaq. Başı ağarmaq. Saqqalı ağarmaq.
– Ağardı muyi-sər, qəddin xəm oldu, taqətin getdi; Sənə layiq deyil, Seyyid, belə məşuqəbaz olmaq.
6. Rəngi getmək, solmaq, bozarmaq. Parça yuyulan kimi ağardı. Gündən paltarım ağardı.
7. Açılmağa başlamaq; dan yeri sökülmək, işıqlanmaq.
Gözü üfüqə sataşanda səmanın ağardığını hiss etdi.
Şərq üfüqləri ağarmağa başlayırdı.
8. İrinləyib yetişmək (yara, çiban).
9. Yetişib vaxtı ötmək.
…Gömgöy olan bir taxıl, görürsən bir gün çallayıb, bir gün ağarır, vağanıyır, bir azdan tökülür, çürüyür.
10. məc. Üzünün rəngi qaçmaq (qorxudan).
Sərdar Rəşidin üzü qızarır və yenə də ağarırdı.