1. Azadlıqdan istifadə edən, başqasından asılı olmayan, sərbəst. Azad xalq. Azad əmək. Azad həyat. Azad seçki hüququ.
2. Maneəsiz, əngəlsiz, sərbəst, heç bir şeylə məhdud edilməyən. Azad ticarət. Azad satış.
// zərf Rahat, əziyyətsiz. Azad nəfəs almaq.
3. Boş (vaxt haqqında).
Ulduz azad vaxtlarını daima öz kiçik otağında, həvəskarı olduğu rəssamlığa sərf edərdi.
4. nida. Hərbi komanda.
Mirbalayev “azad!” komandası verdi.
◊ Azad edilmək – 1) xilas edilmək, qurtarılmaq, buraxılmaq. Həbsdən azad edilmək;
2) çıxarılmaq, xaric edilmək. İşdən azad edilmək. Vəzifəsindən azad edilmək;
3) tərxis edilmək, buraxılmaq.
[Kusov] üç il bundan əvvəl Qafarın ordudan azad edilərkən birbaş Mingəçevirə gəldiyi günü xatırladı.
Azad etmək – 1) xilas etmək, qurtarmaq. Nəbi Həcəri azad etdikdən sonra bir müddət İranda qalır. “Qaçaq Nəbi”;
2) azadlıq vermək, istiqlaliyyət vermək, azadlığını, istiqlaliyyətini özünə qaytarmaq;
3) buraxmaq, mürəxxəs etmək, getməsinə icazə vermək.
Batalyon komissarı bugünkü söhbəti bununla qurtarıb: – “Sağ ol, Nəcəfov!” – deyib, döyüşçünün əlini möhkəm sıxmaqla onu azad etdi. ;
4) tərxis etmək, buraxmaq. Əsgərlikdən azad etmək;
5) çıxarmaq, xaric etmək. İşdən azad etmək;
6) bir işi; vəzifəni, mükəlləfiyyəti və s.-ni yerinə yetirmək məcburiyyətindən xilas etmək.
Bədənim zəif olduğundan, məni yay imtahanlarından azad etmişdilər.
Azad olmaq – 1) azadlıq əldə etmək, müstəqil olmaq, sərbəst olmaq. Əsarətdən azad olmaq.
– Arif çalışır ki, millət azad olun; Zahid çağırır ki, məscid abad olsun. ;
2) boşalmaq. Yerlər azad oldu;
3) arzu etmədiyi bir vəzifədən, işdən və s.-dən canını qurtarmaq. Müdirlikdən azad olmaq;
4) xilas olmaq, qurtulmaq. Şəhərlər düşmən işğalından azad oldu;
5) məc. doğmaq.
Bir ildə … Zeynəb üçüncü uşaqdan azad oldu. ;
6) işi, məşğələni qurtarmaq.
A qardaşlar, axı bir deyin görüm, mənim nə vecimə ki, səhərlər saat altıda kontora gəlib, axşam saat onda azad olursunuz?
