Ramin Hüseynov

Ramin Hüseynov
Ramin Hüseynov
Şəxsi məlumatlar
Doğum tarixi	8 sentyabr 1993
Doğum yeri	Çaparlı, Ağsu rayonu, Azərbaycan
Vəfat tarixi	8 oktyabr 2020 (27 yaşında)
Vəfat yeri	Füzuli rayonu, Azərbaycan
Dəfn yeri	Ağsu Şəhidlər Xiyabanı
Vətəndaşlığı	Azərbaycan
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2011—2013 /2016-2020
Rütbəsi	Gizir
Döyüşlər	Aprel döyüşləri; İkinci Qarabağ müharibəsi ; Füzulinin azad edilməsi
Təltifləri

Ramin Hüseynov (tam adı: Ramin Qüdrət oğlu Hüseynov; 8 sentyabr 1993; Çaparlı, Ağsu rayonu — 8 oktyabr 2020; Füzuli rayonu, Azərbaycan) — Azərbaycan Silahlı Qüvvələrinin Giziri, İkinci Qarabağ müharibəsi şəhidi.

Həyatı

Ramin Hüseynov 1993-cü ilin sentyabrın 8-də Ağsu rayonunun Çaparlı kəndində anadan olub.^[1] 2001-ci ildə Ağsu rayonu Çaparlı kəndin 1-ci sinifə gedib. 2002-ci ildə Bakı şəhəri, Binəqədi rayonu,284 saylı tam orta məktəbin 2-ci sinfinə daxil olub.2011-ci ildə orta təhsilini başa vuraraq, hərbi xidmətə yollanır. Ailədə 3 qardaşdan kiçiyi idi. Subay idi.

Hərbi xidməti

2011-ci ildə hərbi xidmətə yollanan Ramin 2013-cü ildə hərbi xidməti başa vurur. 2014-cü ildə gizirlik kursuna daxil olmuş və kursu bitirdikdən sonra Azərbaycan Silahlı Qüvvələrinin "N" saylı hərbi hissəsində rabitə taborunun komandir müavini işləmişdir. Fəxri fərmanlarla təltif olunmuşdur. 2016-cı il Aprel döyüşlərinin iştirakcısı olmuşdur. 2020-ci ilin oktyabrın 8-də İkinci Qarabağ müharibəsində düşmənə müqavimət göstərərkən, düşmən tərəfindən atılan minamiyot qəlpəsindən qəlpə yaraları almış və 27 yaşında şəhidlik zirvəsinə ucalmışdır.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ramin Hüseynov ölümündən sonra "Vətən uğrunda" medalı ilə təltif edildi.^[2]

Azərbaycan Respublikası ərazilərinin işğaldan azad olunması zamanı döyüş tapşırıqlarını yerinə yetirərkən cəsarət və fədakarlıq göstərmiş, habelə təşəbbüskar və qətiyyətli hərəkətlər nümayiş etdiyi üçün Azərbaycan Prezidenti İlham Əliyevin 18.12.2020-ci il tarixli Sərəncamına əsasən Ramin Hüseynov ölümündən sonra "Döyüşdə fərqlənməyə görə " medalı ilə təltif edildi.^[3]

Azərbaycan Respublikasının Füzuli rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdiyi üçün Azərbaycan Prezidenti İlham Əliyevin 25.12.2020-ci il tarixli Sərəncamına əsasən Ramin Hüseynov ölümündən sonra "Füzulinin azad olunmasına görə " medalı ilə təltif edildi.^[4]