Vüqar Məmmədov (əsgər, 1994)

Vüqar Məmmədov (9 yanvar 1994; Sumqayıt, Azərbaycan – 9 oktyabr 2020; Füzuli, Azərbaycan) — Azərbaycan Silahlı Qüvvələrinin əsgəri, Aprel döyüşlərinin iştirakçısı və İkinci Qarabağ müharibəsi şəhidi.^[1]

Vüqar Məmmədov
Vüqar İlqar oğlu Məmmədov
Şəxsi məlumatlar
Doğum tarixi	9 yanvar 1994
Doğum yeri	Sumqayıt, Azərbaycan
Vəfat tarixi	9 oktyabr 2020 (26 yaşında)
Vəfat yeri	Füzuli, Azərbaycan
Vətəndaşlığı	Azərbaycan
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2015—2016/2020
Rütbəsi	Əsgər
Döyüşlər	Aprel döyüşləri İkinci Qarabağ müharibəsi  • Füzulinin azad edilməsi

Vüqar Məmmədov 1994-cü ilin 9 yanvar tarixində Azərbaycan Respublikasının Sumqayıt şəhərində anadan olub. 2000-ci ildə Sumqayıt şəhəri 22 nömrəli tam orta məktəbə daxil olaraq, 2011-ci ildə oradan məzun olmuşdur. 2011–2015-ci illərdə Bakı Dövlət Universitetinin İlahiyyat fakültəsində təhsil almışdır.

2015-ci ildə Azərbaycan Silahlı Qüvvələri Quru Qoşunları sıralarında həqiqi hərbi xidmətə başlayan Vüqar Məmmədovun xidməti müddətində Azərbaycan-Ermənistan orduları arasında dördgünlük müharibə baş vermişdir.

Əsgər Məmmədov döyüşlərin ilk günlərindən etibarən həmin müharibədə iştirak etmişdir. Hərbi xidmətdə topçu vəzifəsində və manqa komandiri kimi xidmət etmişdir. 2017-ci ilin yay aylarından etibarən yaşadığı Sumqayıt şəhərində marketdə mühafizəçi və digər işlərdə işləmişdir.

2020-ci ilin 27 sentyabr tarixində Azərbaycan-Ermənistan arasında İkinci Qarabağ müharibəsi başladıqdan sonra könüllü olaraq Füzuli rayonu istiqamətindəki döyüşlərə yollanmışdır.

Vüqar Məmmədov 2020-ci ilin 9 oktyabr tarixində Füzuli şəhər mərkəzinin azad edilməsi uğrunda aparılan Füzuli əməliyyatının gedişatında, baş verən şiddətli döyüşlər zamanı düşmən snayperinin açdığı atəş nəticəsində həlak olmuşdur.